يا ناس يا طيبين 

 

بقلم  محمد حسين

1- بطاقتك اللي في جيبك دي كل بند فيها مهم جدا , مهم للدولة و أجهزتها , اسمك الرباعي مهم عشان كذا , تاريخ ميلادك مهم حتى في أحكام القضاء و في استخراج رخصة قياده و في وفي , وظيفتك مهمه حتى قدام أجهزة الدولة , يعني لو منتحل صفة طبيب و فاتح عياده و دخل عليك تفتيش فالتفتيش ممكن يقبل انه مش معاك كارنية نقابة لكن هيقولك اديني البطاقة اللي اكيد مكتوب فيها المهنة .

.

2- حالتك الاجتماعيه مهمه , مش هينفع تبقى مكتوب أعزب و معاك ست في العربيه و لما بوليس الأداب يقفشك تقولهم دي مراتي وهي مش هينفع تقولهم ده جوزي عشان اسم جوزها مكتوب على ضهر البطاقة و طبعا عنوانك مهم عشان ألف سبب .

.

3- ديانتك المكتوبة مش بتتقّل البطاقة ولا بتخرم المحفظه , دي مهمه في طلاق و جواز و ميراث و دفن وخلافه, قوانين بتنظمها المؤسسات الدينية ( الكنيسة و الأزهر ) و بيقرها البرلمان و الدستور .

.

4- أنا مش بشتكي من وجود خانة الديانة في بطاقتي و مش بتفشخر بيها ولا شايل البطاقه و كل ماقابل واحد في الشارع اقوله بص انا مسلم اهو , ولا المسيحي بيعمل كده ولا أعرف مسلم ولا مسيحي مضايقاه الحكاية دي أو حازه في نفسه .

.

5 – تجارب و ثقافة الدول التانيه غير ملزمه لنا و الكلام ده قاله السيسي شخصيا , كل دولة لها خصوصيتها , و من خصوصية مصر مثلا و رحمة ربنا بيها إن سكانها بالكامل كده عباره عن مسلمين سنه و مسيحيين , مش هتلاقي عندنا حاجه تانيه , الشيعه تلاقيهم 17 نفر و اليهوd كانو 7 باين مات منهم 4 وباقي 3 .

.

6- مش كل حاجة تترمي في حجركو فجأه كده تهيصو بيها و تخلقو أزمه من لا شئ , و خليكو فاكرين في 2011 اترمى في حجرنا شوية شعارات عنب , حرية و ديموقراطية و ربيع و أه يالميدان , وبعدها كنا هنركب الزحليقه و نروح في سكة اللي يروح مايرجعش , خلي الدماغ صاحي .

.

7- فكرة أصل ال RQ وال PH و ال WC ممكن يجيبو كذا و كذا هي فكره جميلة خالص و تصلح لبرنامج أوتار الليل , لكن تطبيقها على 100 مليون نسمة في دولة مساحتها مليون كيلو متر مربع فيها الطيب والشرير و القريه والمدينة والنجع واللي عارف واللي مش عارف واللي عنده سيستم و اللي معندوش هتبقى معجنة يافندم , واحنا هنا بنتكلم عن أنساب و أرحام , مش لعب عيال يعني .

.

8- انا شخصيا ماعرفش ان فيه فتنه طائفية أو خناقة بتحصل بين مسلم و مسيحي سببها خانة الديانة اللي في البطاقة , يعني مفيش واحد بيقول للتاني وريني بطاقتك كده ياض ؟ ايه ده انت مسيحي ؟ طب خد بقى , لا حضرتك العاركات دي بتحصل بين ناس عارفين بعض كويس و عارفين عائلات بعض و مش محتاجين يبصو في بطايق .

.

9- بالراحه على نفسكو شوية و بالراحة عالبلد , مصر مش أمريكا ولا موزمبيق ولا اليابان , مصر هي مصر , هتتطور بنفسها و من نفسها و بهويتها الشخصيه , مش بتجارب الأخرين ولا بإرهاصات ابراهيم عيسى , أه و عهد الله زي مابقول لكو كده .

Read Previous

أفلام الكارتون .

Read Next

الشعباني مديراً فنياً للمصري البورسعيدي

error: حقوق الناشر محفوظة
%d مدونون معجبون بهذه: